Fréttasafn

Laugardaginn 21. október kl. 15-15.15 og 16-16.15 verður Tólf tóna kortérið á dagskrá í Listasafninu undir yfirskriftinni Hver er þessi fiðla og hvernig koma hljóðin úr henni? Þá mun Sophia Fedorovych, fiðluleikari- og kennari, flytja verkið Litla fiðlan fyrir börn á öllum aldri. Hún mun jafnframt kynna fiðluna fyrir gestum og jafnvel leyfa þeim yngstu að snerta strengina. Sophia er nýflutt til Akureyrar og kennir nú við Tónlistarskólann á Akureyri. Hún er þaulreyndur kennari, en fiðluleikur og miðlun til yngri kynslóðarinnar eru hennar ær og kýr. Aðgangur er ókeypis.

Þriðjudaginn 17. október kl. 17-17.40 heldur ítalska myndlistarkonan Elena Mazzi Þriðjudagsfyrirlestur um rannsóknir sínar á sambandi manns, náttúru og menningar. Í vinnu sinni endurtúlkar hún menningarlega arfleið staða, fléttar inn í það sögum, staðreyndum og fantasíum sem sprottnar eru í nærsamfélögunum í þeim tilgangi að nálgast lausnir í togstreitu manns og náttúru. Með mannfræðilegum vinnuaðferðum leitast hún við að finna heildræna nálgun sem miðar að því að brúa gjár samfélagsins. Í fyrirlestrinum segir hún einnig frá nýlegum verkefnum sínum t.d. Polar Silk Road.

A! Gjörningahátíð hefst í dag kl. 17 í Hofi með gjörningi Hörpu Arnardóttur, Það komast milljón jarðir fyrir inni í sólinni. Næst tekur við Aðalheiður S. Eysteinsdóttir með gjörninginn Sinfónía / Symphony kl. 20 og fer hann einnig fram í Hofi. Í Listasafninu kl. 20:45 fer fram gjörningur brasilíska listamannsins Tales Frey, I Costume For II, og dagskrá fyrsta dagsins lýkur með hinum bandaríska Dustin Harvey og gjörningi hans Alone Together, sem fram fer í Mjólkurbúðinni kl. 21.20. A! Gjörningahátíð stendur yfir 5.-8. október. Ókeypis á alla viðburði.

Afrakstur seinni listsmiðjunnar í verkefninu Látum vaða!, sem fór fram í Listasafninu 30. september síðastliðinn, er nú til sýnis í safnfræðslurýminu. Smiðjan tengist sýningunni Einfaldlega einlægt þar sem sýnd eru málverk listakonunnar Katrínar Jósepsdóttur, sem oftast var kölluð Kata saumakona. Málverk Kötu eru einlæg og gefa sig ekki út fyrir að vera neitt annað en þau eru. Listakonan „lét vaða“ á eigin forsendum og verkin eru því mikilvæg hvatning fyrir bæði börn og fullorðna. Allir geta skapað og útkoman getur komið á óvart.

Föstudagskvöldið 6. október kl. 20-22 verður opnuð sýning brasilísku myndlistarmannanna Tales Frey og Hilda de Paulo, Leiðnivír. Sýningin er hluti af A! Gjörningahátíð sem stendur yfir dagana 5.-8. október.

Þriðjudaginn 3. október kl. 17-17.40 heldur Dísa Thors, húðflúrari og teiknari, fyrsta Þriðjudagsfyrirlestur haustsins undir yfirskriftinni Húðflúrun. Þar mun hún fjalla um húðflúrun í máli og myndum og tala m.a. um uppruna húðflúrunnar og mismundandi stíla og aðferðir.

Laugardaginn 30. september kl. 15-15.15 og 16-16.15 mun Tólf tóna kortérið hefja göngu sína að nýju. Þá flytur trommuleikarinn Rodrigo Lopes frumsamin lög undir yfirskriftinni Hljóð náttúrunnar. Tónleikarnir fara fram í sal 04 og er aðgangur ókeypis.

Sunnudaginn 24. september kl. 11-12 mun Heiða Björk Vilhjálmsdóttir, fræðslufulltrúi, segja börnum og fullorðnum frá sýningunum Hringfarar og Að vera vera. Að lokinni leiðsögn er gestum boðið að búa til sitt eigið listaverk, innblásið af verkum listamannanna.

A! Gjörningahátíð fer fram á Akureyri 5.-8. október næstkomandi. A! er fjögurra daga alþjóðleg gjörningahátíð sem haldin er árlega og nú í níunda sinn. Ókeypis er inn á alla viðburði.

Skráning í seinni listsmiðju Listasafnsins undir yfirskriftinni Látum vaða! stendur nú yfir. Smiðjan verður haldin 30. september kl. 13 undir handleiðslu Egils Loga Jónassonar myndlistarmanns. Að þessu sinni fá börn og fullorðnir tækifæri til að skapa sitt eigið verk út frá tveimur ólíkum póstkortum og mála þau svo saman í eina mynd. Að því loknu fer myndin í ramma sem þátttakendur skreyta sjálfir. Egill Logi nam myndlist við Listaháskóla Íslands og vinnur í ýmsa miðla. Hann er einn af aðstandendum listahópsins Kaktus.