Guðir og menn
Á Akureyrarvöku, laugardaginn 28. ágúst kl. 15, verða tvær ljósmyndasýningar opnaðar í Listasafninu á Akureyri, annars vegar hin árlega sýning Blaðaljósmyndarafélags Íslands og hins vegar sýning á myndröðinni Trú eftir norska ljósmyndarann Ken Opprann.
Myndir blaðaljósmyndara eru í ólgandi litum, ágengar og átakanlegar, teknar á stafrænar vélar af dýrustu sort sem fanga hvæsandi hita andartaksins í margra megabæta upplausn. Til samanburðar tekur Opprann sínar myndir á filmu í svarthvítu með gömlu aðferðinni.
Íslenskur veruleiki, linnulausar erjur í bland við niðurdrepandi múgæsinginn, víkur fyrir kyrrlátri sjálfsskoðun, skarkali ytri veruleika fyrir bljúgri bæn, hér og nú fyrir því tímalausa.
Í klefa vestursalar Listasafnsins hefur verið komið upp hefðbundnu myrkraherbergi þar sem gestir fá að kynnast framköllun og stækkun mynda frá filmu yfir á pappír. Hér sýna meðlimir í Áhugaljósmyndaklúbbi Akureyrar ljósmyndir teknar á filmu og þau tæki, efni og vinnuaðferðir sem þeir beita í aðstöðu félagsins, sem starfað hefur í tvo áratugi í bænum.
Meira um sýningarnar >>
Per Landrö, menningarfulltrúi norska sendiráðsins, opnar sýninguna. Daginn eftir, sunnudaginn 29. ágúst kl. 15, mun Ken Opprann halda erindi um list sína í Deiglunni á Akureyri og er aðgangur ókeypis.
Sýningarnar standa til 17. október.
Nánari upplýsingar veitir Hannes Sigurðsson forstöðumaður í síma 461-2610/899-3386. Netfang: hannes@art.is.
Listasafnið er opið alla daga frá kl. 12–17 og er aðgangur ókeypis í boði Akureyrarbæjar.
Í mars lítum við yfir langan feril listmálarans Tryggva Ólafssonar, en þá opnar sýning hans í Listasafninu á Akureyri. Tryggvi nam myndlist bæði hér heima og í Kaupmannahöfn og er meðal þekktustu núlifandi myndlistarmanna Íslendinga. Hann hefur haldið fjölda einkasýninga og tekið þátt í samsýningum í fjölmörgum löndum. Verk Tryggva prýða bækur og blöð og hann hefur skreytt byggingar á Íslandi og í Danmörku.
Í bókinni Facing China eru verk einstakrar kynslóðar listamanna sem blómstruðu eftir uppreisnina 1989. Bókin er mjög vegleg og inniheldur greinar eftir Hannes Sigurðsson forstöðumann Listasafnsins á Akureyri, Vigdísi Finnbogadóttur fyrrum forseta og listgagnrýnendurna Li Xianting frá Kína og Robert C. Morgan frá Bandaríkjunum.